انا صح وبابا صح ..

اول امبارح كنت عماله اتناقش واتجادل
مع بابا فى شىء ما
وانا بقول رأيى وبابا كمان
انا مقتنعه بكلام بابا وكلامه صح بس هو لأ
مع ان كلامى صح وماما معايا كمان ومحمد
،،،
الموقف ده فكرنى بقصة
بتحكى عن .. ان طُلب من ثلاثة عميان
انهم يدخلوا غرفة فيها فيل ويكتشفوا هو عامل ازاى

الاول قال انه اربع عمدان
والتانى قال زى الثعبان
والتالت قال زى المكنسة
والتلاته قعدوا يتخانقوا ويتجادلوا
وكل واحد متمسك برأيه
مين فيهم غلط ؟؟
،،،
ولا واحد
:: لأن كل واحد اعتمد على برمجته بالاحساس بالشىء ::
واحد ماسك الرجلين
والتانى الخرطوم
والتالت الذيل

بس لو حد فكر فيهم انه يأخذ راى التانى ويجمعه
مع باقى الاراء حيكون شكل للفيل

ومن هذا المنطلق بقول لبابا او اى حد
ان للحقيقة وجوه كثيرة
لما بنختلف ده مش معنى ان فى حد منا على خطأ
ممكن نكون كلنا على صواب
،،،
لأن ببساطه شديدة كل منا
" يرى ما لا يراه الاخر"
لكن لا نعتمد فقط على نظرتنا للأمور لازم اسمع اراء باقى الناس
لأن كل واحد عنده حاجه حتفيدنا ومنها حنقدر نكون رأى شامل وسليم

بعيدا عن ده بقى
انا صح يا بابا

D: